Зоз инициятиву орґанизованя рускей школи у Новим Садзе 1862. року не розришени шицки проблеми у вязи зоз тим. Точнєйше поведзене - во­ни лєм начати. Правда, пивцоучитель Петро Поляк пришол до Нового Саду, места ше у дзияковнї нашло, ле требало ришиц ище два барз важни проблеми: учительска плаца и дошлєбодзенє отвераня школи од церковних и од державних власцох. Цо ше дотика церковних власцох, ту йшло легко. Владика Дюра Смичиклас не лєм же дошлєбодзел отверанє рускей школи у Новим Садзе, лє и обецал же од себе будзе давац учительови рочну награду од 60 форинти.

Дня 20. октобра 1863. року парох Лабош ше обрацел зоз писмену представку до маґистрату городу Нового Саду и модлєл же би маґистрат з потреби школи дал лавки и шицко друге цо потребне, а тиж и же би вжиме обезпечел топенє. Место лавкох и древа за топенє Лабош достал акт под чис­лом 3724 з котрим його молба одбита. Теди ше парох и дзияк-учитель обрацели до Керестура и Коцура и замодлєли од парохииох у тих местох помоц. И достали ю! Зоз Коцура достали лавки и 23. прила 1964. року Петро Поляк послал извистиє до Владичества у Крижевцох, у котрим пише же за школу єст способних 32 дзеци, але же до школи ходза лєм дванацецеро.

По документох цо их публиковал Васа Стаїч, випатра же, заш лєм, маґистрат одредзел Полякови плацу од 200 форинти, Министерство просвити ю звекшало на 400 форинти рочнє. Учитель Петро Поляк 1877. рок бул член Муниципийней школскей ради за город Нови Сад, а Грекокатолїцке церковне общество 1876. року достало од городских власцох на мено субвенцийох 500 форинти. И познєйше воно доставало субвенциї за школу.

Не длуго ше Андри Лабош цешел з руску школу у Новим Садзе, бо, як познате, 1864. року бул премесцени до Далмациї, а у Новим Садзе го нашлїдзел Василий Лусканци, з котрим ше упознаме у шлїдуюцим предлуженю. Бон предлужел борбу з школу. Петро Поляк учел дзеци до 1883. року, кед пошол до пензиї. Познєйше у Новим Садзе учителє у рускей школи були: Михайло Джуня, Емил Ґубаш, Оскар Будински и Юлияна Будински.

На руским теметове у Новим Садзе Петро Поляк збудовал хижу и подаровал ю новосадскому церковному обществу же би у нєй бивал гробар, хтори будзе мац обовязку шориц його гроб. Тот акт, видруковани и урамени до рамикох под склом, длуго вишел на муре у олтаре новосадскей парохиялней церкви. Тераз є у архиви. Хижа после другей шветовей войни, як и сам теметов - национализована.

Руска церковна школа у Новим Садзе исновал до 1921. року, а познєйше була подержавена же би ше на концу загашела.

Дня 2. авґуста 1852. року у нашей новосадскей церкви на Служби Божей бул австро-угорски цар Франьо Йосиф І.