Кельо авторови тих шорикох познате, на брегох Дуная находза ше штири, пейц або шейсц руско-українски грекокатолїцки парохиї. Найблїжей ґу жридлу Дуная парохия у Бечу, вец у Братислави, Вуковаре, Новим Садзе и у Беоґрадзе. Поведзене -штири, пейц або шейсц, бо тота у Беоґрадзе, гоч була правно основана, нєшка є не активна, а судьбу вуковарскей парохиї знаме. И у Будапешту иснує грекокатолїцка парохия, и то не єдна, але чи их мож наволац - руски. Найстарша од нїх парохия у Новим Садзе, а лем дакус младша - у Бечу.

До Нового Саду Руснаци ше почали селїц такой после приселєня до Керестура и Коцура. Але, випатра, же окрем з тих двох валалох, дзепоєдни ше ту приселєли ровно зоз Горнїци. Праве тоти зоз Горнїци селєли ше спочатку до Петроварадину и до Сримских Карловцох. Спрам виглєдованя д-ра Янка Рамача, перши податки о присельованю Руснацох до Нового Саду маме зоз 1766. року. Городски сенатор Милинкович приявел же Руснаци ту приселюю и без одкупу забераю городску жем. А у записнїку Канонскей визитациї у Коцуре з 1767. року написане, же ше хроме Руснаци, зос своїма фамилиями преселєли до Нового Саду та ше предклада римокатолїцкому парохови у Новим Садзе же би примерковал на тоти фамелиї и же би о нїх информовал коцурского пароха.

До Нового Саду зоз Керестура и Коцура найчастейше присельовали людзе хтори не мали жеми и хтори ше ту могли знайсц за роботу як наднїчаре, слугове и служнїци. У Новим Садзе ше знало же ше число Руснацох помали звекшує, але кед их требало пописац, зявйовали ше почежкосци.

Маґистрат ше оправдовал же ше не може знац о каждому Руснакови хтори пребува у городзе, и же их єст мало. Медзитим, Церква ше старала о каж­дому Руснакови хтори ше присельовал до Нового Саду и зазберовала их. И 1780. року Крижевске владичество, зоз владику Василийом Божич-ковичом на чолє, основало парохию у Новим Садзе. Була то треца по шоре парохия за приселєних Руснацох до тих крайох и перша цо була основана у новим Крижевским владичеству, котре основане 1777. року. За першого пароха до Нового Саду поставени Силвестер Бубанович, ректор духовней семинариї у Загребу, котри познєйше постане и Крижевски владика. До Нового Саду вон пришол слїдующого 1781. року. У медзичаше медзи владичеством у Крижевцох и Маґистратом у Новим Садзе вичераю ше даскельо оштрейши писма.

Тедишнї ґенерални викар Крижевского владичества Иосафат Басташич, зоз своїм писмом Маґистрату Нового Саду, поволуюци ше на кральовски декрет од 6. априла 1781. року и розказ владики Василия Божичковича, глєда же би ше у Новим Садзе окончела канонска визитация за грекокатолїкох. Вон пише же у Новим Садзе нашол даєдних котри скорей були грекокатолїки, але пре незнане, або заведзеносц, прешли на православну виру. Прето ище раз вимага од Маґистрата же би ше пописало шицких Руснацох котри ту жию. На тоту молбу Йосафата Басташича, Маґистрат 25. юния истого року одредзел двох сенаторох же би окончели попис Руснацох у Новим Садзе. Познєйше, 9. авґуста 1781. року, Басташич ше заш обрацел Маґистрату и вимагал же би ше опомло правосланих, гражданох и священїкох, же би не прецаговали Руснацох на православну виру. Силвестер Бубанович, новосадски грекокатолїцки парох, 17. децембра 1781. року писал. же у городзе єст вельо руски дзивки хтори робя як служнїци по сербских гражданских фамелийох, а даєдни те и одаваю за Сербох и так зохабяю свою виру.