XРОНЇЧАР РУСКЕЙ ДУШИ

 

СЛОВО РЕДАКЦИЇ

Роки живота як бразди вредного орача. Док ше ору нєт часу о нїх вельо роздумовац бо уж нарок треба ознова жем зашац и наздавац ше урожаю. Кед би нє було так, цо би вец орача тримало на витирвалей драги. Окреме кед ше оре зоз пирком и мудрим словом дзе доход до здравого зарна сам по себе чежши алє и хасен од нього, як час преходзи, остава тирваци. Дзекеди ше, медзитим, заш лєм укаже нагода же би орач станул, очухал росу зоз чола и огляднул ше на поробене.

У 2006. року означує ше красни ювилей – седемдзешат роки живота и пейдзешат роки плодней творчей роботи новинара, публицисти, историчара и наукового виглєдовача Мирона Жироша. Кнїжка хтора ше видава з тей нагоди представя персоналну био-библи-оґрафию ювиланта. Задумка нам же би ше на єдним месце пробовало призначиц шицки публиковани роботи Мирона Жироша, фахову литературу о нїм и же би ше на систематични способ приказал його професийни розвой.

За оправданосц такого подняца, з оглядом на обсяг, рижнородносц и богату наукову и литературну рецепцию Жирошового дїла, сполнюю ше шицки условия. У предходних пейцоx деценийох „ нємирни ” виглєдовацки дух Мирона Жироша резултовал зоз роботами на полю радио-новинарства, документарним телевизийним филме, публицистичних статьйох, литератури, же би у єдней хвильки богате фактоґрафске искуство постало темель за писанє вецей наукових, историоґрафских и етноґрафских моноґрафийох. Заєднїцки менователь за таки широки дияпазон Жирошового опусу то предмет його виглєдованьох – комплексна прешлосц Руснацох. Прето кнїжка символично насловена „Xронїчар рускей души“.

Сумарно поведзене, слово о 239 призначених библиоґрафских єдинкох Мирона Жироша. Розумлїве же их, вироятно, єст и вельо вецей, алє анї єдна библиоґрафия нє може призначиц шицки авторово єдинки. Його кнїжки и науково сепарати нєшка єст у институтох и наукових библиотекох вецей европских академийох наукох (национални академиї України, Словацкей, Мадярскей) и другиx академских и наукових установох. Нє менєй важне наглашиц же вони нашли своїх вирних читачох, як прецизно реґистроване, у трицец жемох на штирох континентох. Їх змист тиж можлїве препатриц на вецей веб сайтох русинскей провиниєнциї. Одгуки на таку роботу нє виостали. Виражени су як позитивни рецензиї, прикази, дружтвени припознаня и награди. Єдна з найновших верификацийох Жирошовей виглєдовацкей роботи ушлїдзела 2000. року кед є вибрани за члена Историйно-филолоґийного оддзелєня углядней науковей институциї Товариства „Т. Шевченко“ зоз шедзиском у Французкей.

Кнїжка „Xронїчар рускей души“ ма штири часци. У першей з нїх представени змист осем моноґрафийох Мирона Жироша и єден тематски зборнїк. Источасно призначени и информациї о їх рецензийох и приказох хтори зависно од задумки пририхтовача обявени у цалосци лєбо у виривкох. Рецензиї писани по руски, сербски, українски и мадярски, та ше на тих язикох и публикую. У другей часци тей публикациї 239 био-библиоґрафийни єдинки хтори обявени у преси, периодики и наукових зборнїкоx. Треца часц облапя його роботу у новинарстве. Ту интервюи, прикази, святочни бешеди и реаґованя з нагоди достатиx наградоx и припознаньоx и його новинарскей роботи вообще. У штвартей часци составена библиоґрафия литератури о творчосци Мирона Жироша.

Видавательство „Руского слова“ дзекує Миронови Жирошови на помоци и понукнутих материялох на основи хторих тота публикация зложена. Наздаваме ше же плод тей роботи будзе доприношенє красному ювилею, хтори и ювиланта и видавача поруша на будуце сотруднїцство.