СПАТРАНЄ ДВАСТОРОЧНЕЙ ПРЕШЛОСЦИ

 

(Руснаци у Шидзе и околних местох – три значни ювилеї, КПД „Дюра Киш” и Грекокатолїцка парохия Преображеня Господнього, Шид, 2007)

 

Кнїжка Руснаци у Шидзе и околних местох – три значни ювилеї, колективне дїло вецей авторох, дакедишнїх и терашнїх жительох Шиду и околних валалох: Бачинцох, Беркасова и Бикич Долу. Кнїжка представя цалосне спатранє двасторочней прешлосци живота Руснацох од їх урядового преселєня з Бачкей до Сриму, односно їх дружтвеного, релиґийного, културного и националного живота по 2003. рок, кед отримана Централна преслава 200-рочного ювилею. У кнїжки слово о „200-рочнїци присельованя Руснацох до Шиду (1803-2003)”, „200-рочнїци снованя Грекокатолїцкей парохиї Шид (1810-2010)” и „85-рочнїци роботи руского Културно-просвитного дружтва у Шидзе (1920-2005)”.

Кнїжку видали: Орґанизацийни одбор за преславу Двасторочнїци присельованя Руснацох до Шиду и околних местох, Културно-просвитне дружтво „Дюра Киш” и Грекокатолїцка парохия Преображеня Господнього – шицки зоз Шиду. Змист кнїжки утвердзела дзешецчлена Редакция. Кнїжку зложела и главни єй редактор Леона Гайдук-Лабош. Видана є з материялну потримовку Секретарияту за управу, предписаня и национални меншини АП Войводини, Скупштини општини Шид, Грекокатолїцкей парохиї Преображеня Господнього и вецей спонзорох. Кнїжку видруковала Друкарня „Passo-print” зоз Руского Керестура, ма 232 боки, тираж 400 прикладнїки.

Кнїжка зложена зоз штирох часцох. У першей часци под насловом Програма на чесц ювилея – 200 роки од присельованя Руснацох до Шиду (1803-2003) пише яка планована и реализована програма ювилея и пренєшени написи з „Руского слова” под насловами Два столїтия на тих просторох, Литературно-музични вечар и Шветочни концерт як дарунок. Друга часц кнїжки представя обявени реферати зоз Нуково-фахового совитованя, отриманого у рамикох преслави. Авторе сообщеньох проф. др Янко Рамач Руснаци у Шидзе (1803-1848); о. мр Михайло Малацко Релиґийно-духовни живот у Шидзе (1803-2003); Мирон Жирош Руснаци у Шидзе и борба за управну самостойносц-автономносц; Леона Лабош-Гайдук Присельованє Руснацох до Беркасова; Ирина Папуґа Бачинци од прешлосци по нєшка; Василь Мудри и Ирина Папуґа Бикич Дол – населєнє и жительство; Василь Мудри Зоз историї рускей школи у Шидзе; Штефан Гудак Доприношенє писательох Шида литератури на руским язику; Мирослав Цирба Початок орґанизованого културного живота Руснацох у Шидзе и о. Мр Роман Миз Театрална дїялносц у Шидзе медзи двома шветовима войнами. Треца часц кнїжки обрабя 85-рочнїцу културно-просвитного дружтва Дюра Киш у Шидзе (1920-2005). Тота цалосц представена з написами шейсцох авторох директних учашнїкох у културним живоце рускей народносци. Борислав Барна пише же шветочно означена 85-рочнїца КПД Дюра Киш (1920-2005) и 10-рочнїца од отвераня нового руского дома, а Мирослав Цирба у своїм обсяжним документарним спатраню, под насловом „Руске КПД Дюра Киш чувар традициї и ношитель розвою националней култури у Шидзе” преанализовал роботу хорскей, шпивацкей, музичней, драмскей, фолклорней и других секцийох од снованя Дружтва 1920. року та по нєшка. У рамикох трецей часци кнїжки обявени ище штири написи з корима спатрене мено и орґанизация живота и роботи дружтва як и значни подїї зоз културного живота Руснацох у Шидзе. То: Валянє  будинка Старей  рускей школи у Шидзе, потим Як будовани нови руски дом и напис Нови руски дом 1995. року пошвецел владика кир Славомир Микловш. У спомнутих написох дати детальни информациї и о предсидательох Друштва Дюра Киш, руководительох аматерских секцийох як и членох Дружтва у прейдзеним чаше.

Значне наглашиц же у кнїжки указане и на плани за наиходзаци часи. То насампредз ''звекшац число членох и секцийох, зачувац посцигнути квалитет роботи, реализовац нови драмски проєкт и винаходзиц нови методи у руководзеню''. Шлїдза и дальши плани: преширенє сотруднцтва на медзинародним уровню, снованє фестивалу младих поетох, снованє библиотеки Дружтва, отворанє тирвацей вистави о роботи Дружтва и фахово допатранє и дополньванє Етно-збирки зоз експонатами.

Штварта часц кнїжки облапя биоґрафиї Руснацох котри афирмовали Шид у рижних дїялносцох. Слово о осем старших руских преднякох: о. Дюра Бесерминї; Григорий Дуда, учитель; Мати Софрония Ерделї, шестра Василиянка; Янко Ерделї, прифесор; Илия Крайцар, правнїк; о. Андрий Лабош, старши; Евґен Ґена Сабо, професор и др Дюра Тимко, лїкар; тринац науковцох, уметнїкох и вершинских спортистох: проф. Др Невенка Аджич Исакович, нар. Лазор; др Евґения Барич Горняк; Надїя Волчко, академски маляр; др sci vet. med. Владимир Гайдук; проф. Др Емил Гнатко; др Стеван Константинович; др Владимир Ковач, наукови сотруднїк; др Мирон лазор, наукови сотруднїк; др Мирон Рогаль, економиста польопривредних наукох; Борис Семан, наукови сотруднїк; проф. др Кирил Сидор, вирусолоґ; др Желько Файфрич, правни науки и Петро Файфрич, олимпиєц; и двацец двох познатих привреднїкох и дружтвених роботнїкох.

У кнїжки обявена и статя о ище єдним ювилею – трицец рокох роботи Подружнїци Дружтва за руски язик, литературу и културу. На концу текстох обявени резиме на сербским язику.

Кнїжка богато илустрована з автентичнима фотоґрафиями: 42 у колору, коло 80 у чарно-билей технїки и 70 портрети значних дїячох дружтвеного, привредного и културного живота котри аформую Шид у рижних дїялносцох. У нєй обявени и вецей винєти Владимира Ґовлї. У писаню прилогох за кнїжку участвовали 22 авторе: науковци, публицисти, новинаре, просвитни роботнїки як и сами културни дїяче, другорочни активисти у дружтвеним и културним живоце Руснацох у Шидзе и околних местох.

Вельке информативне богатство кнїжки представяю 20 биоґрафски призначки шидских священїкох-парохох, дзевец писательох, пейц предсидательох Дружтва и 43 биоґрафиї старших руских преднякох, науковцох, уметнїкох, вершинских спортистох, познатих привреднїкох и дружтвених роботнїкох.

Патраци у цалосци кнїжка „Руснаци у Шидзе и околних местох – три значни ювилеї” представя обсяжне документарне спатранє нашого руского дружтвеного и културного иснованя у Сриме и ширше у Войводини. Грекокатолїцка церква, Руске културно-просвитне дружтво и школа (пестованє мацеринского язика) були штредки културного и националного живота Руснацох, а привредна и дружтвена активносц були поля дїялносци на котрих Руснаци вєдно з другима жителями Шиду доприношели общому дружтвеному напредованю. Тота кнїжка, а окреме єй штварта часц, бешедує о Руснацох як интеґрарней дружтвено-политичней и привредней цалосци Шида, Срима и Войводини и доприношеню Руснацох праве вкупному розвою и напредованю подручох у котрих жию уж 200 роки.

 

 

(„Шветлосц”, Нови Сад, 2008, ч. 4, октобер-децембер, б. 604-606)

 

Початок :: Početak :: Home