Бесіда:
— Ей, кумо, кумо, як я вас люблю!
— А то чом так, куме?
— Чом? Три місяці, як сте по весілю, и юж крестины справляте, а моя стара дырдуля юж девят місяців, як чекат и все нич нема и нема.
— Ой, куме, чекала и я, але вы не знате, як то было.
— Та як то было, кумо як?
— А то так было, куме:
Три місяці зме ся знали, як зме коровы навертали, а три місяці, як зме на кошарах ночували, а три місяці як зме ся поженили, то три а три, то шест, а три, то девят, правда куме?
— О! То вы так рахуєте, так! Но як повідал мій небіщык дідо, так и правда, же баба и дябла з розума вывела.
Не любил єм тя,
Сама-с ходила,
Не найдеш ты на мя
Жадного права. /2х/
А хоц бы-с пішла
До єгомосця,
Не найдеш ты на мя
Справедливостя. /2х/
Бесіда:
— Кумове и кумы! Ічте, пийте и сьпівайте, бо в мене крестины. Моя стара породила мі сына три місяцы по весілю. — То єст жена, ні!?
— Мате правду, куме, такой жены нихто нема на цілом сьвіті.
— Но дай нам Боже здоровичко, кумусю моя люба!
— Пийте здорови!
— И до вас, куме, пийте здорови!
Сьпів:
Ей, куме, куме, дайте вина,
Будете мати, куме, сына,
Ей, як не дате лем згорілкы,
Будете мати самы дівкы. /2х/
Ей, куме, куме, дайте пива,
Будете мати, куме, сына,
Ей, як не дате, лем гарбаты,
Будете мати кучеряты. /2х/
Ей, кумо, кумо, дайте істи,
Будете мати кумо близьці,
Ей, як не дате лем выпити,
Не будете веце мати діти. /2х/
Урывкы текстів з: "Лемковска Пісня" в: Ваньо Гунянка, ред. Карпаторусскій Календаръ Лемко на 1930 рік (New York, Cleveland, Philadelphia 1929): 32-49; "Исторія Первого Лемковского Рекорду", Карпаторусскій Календаръ Ваня Гунянки на 1931 рік (New York, Cleveland, Philadelphia 1930): 128-131; Стефан Шкимба История першой рекорды "Лемковсе Весіля", Николай Цисляк, ред. Карпаторусскуй календаръ Лемко-Союза на год 1963 (Yonkers, NY, 1962): 114-132.
Document Information
Document URL: http://lemko.org/lemko/madzik/lw5.html
Return to Lemko Home
PageDate Posted: July 28, 2002
Last Revision:
| LV Productions c/o Walter Maksimovich 3923 Washington Street, Kensington MD 20895-3934 USA |