(Зальоты, іношы, спросины, заручыны)
Повіч мі, Катрено
Повіч мі, Катрено,
Повіч мі на разі,
Най моі коникы
Не стоят на дразі.
Бо моі коникы
Дуже мя коштуют,
Ани єдну ночку
Дома не ночуют.
Радте же ся радте
Радте же ся радте,
За кого мя дате.
Моя рада така,
Же лем за гудака.
Гудак буде грати,
А я танцювати.
Так мы ся буде
Хліба дорабяти.
Зозуля кукала,
Правду повідала,
Же я ту не буду,
Где-м ся выховала.
Ой, дівча, дівча.
Ой, дівча, дівча
З паньского роду,
Выйд-же ты ґу мі
На загороду.
Гоя-гоя, гоя,
Выйд-же ты ґу мі
На загороду.
Я бы вышла,
Але ся бою,
Ты бы мя здрадил,
О то не стою.
Гоя-гоя, гоя,
Ты бы мя здрадил,
О то не стою.
Катрено моя,
Напій мі коня,
Не напою, бо ся бою.
Бо ищи-м не твоя.
Гоя-гоя, гоя,
Бо ищи-м не твоя.
На Вінцях
Сходте ся дівчата
Складайте барвіночок
На Оленин віночок
Вий ся нам віночку гладко
Як червененьке ябко
Од волоска до волоска
Най же иде поголоска
Прошу мамко вінкы вити
Прошу поблогословити
А мамонька єй так мовит
Най тя моя дівко - Господ благословит
* * *
Мамусь, моя мамусь, єдну мене мате,
Лем сой подумайте, за кого мя дате.
Ци за богатого, ци за гудобного
Кобы лем мамичко, гея, за гардого.
Віночок
Віночку, віночку, з дрібного барвіночку
Як єм тя тримала, в ладі в прискриночку.
Тримала тримала, не могла тримати
Пришли добры люде, мусілам тя дати.
Дай ся вінку красні вити, юж я тя не буду білше носити.
Лем тоту суботоньку, и в неділю годиноньку.
Выбивай Марисю, по сцінах клиночкы
Там где ты вішала, зелены віночкы.
Не буду, не буду, клиночкы выбивала
Зостає ту сестра, то буде вішала.
Мамцьо, Мамцьо
Мамцьо-мамцьо, мамичко моя, /х2
Купте вы мені периночку,
Най ся выдам того рочку.
Мамцьо-мамцьо, мамичко моя.
Дівусь-дівусь, дівочко моя, /х2
А ищы ты не доросла,
Жебы ты уж замуж пошла,
Дівусь-дівусь, дівочко моя.
Мамусь-мамцьо, мамичко моя, /х2
Лем вы на то нич не дбайте,
А мене уж замуж дайте,
Мамусь-мамусь, мамичко моя.
Дівусь-дівко, дівочко моя, /х2
Треба скринкы и до скринкы,
Заголовків и перинку,
Дівусь-дівко, дівочко моя.
Мамо-мамцьо, мамичко моя, /х2
Ліпше з мужом на камени,
А як з вами на постели,
Мамо-мамцьо, мамичко моя.
Дівусь-дівко, дівочко моя, /х2
Більше будеш кыйом бита,
Як при мужы хліба сыта,
Дівусь-дівко, дівочко моя.
Мамусь-мамцьо, мамичко моя, /х2
Нич вы на то — нич не гварте,
Лем вы мене замуж дайте,
Мамусь-мамусь, мамичко моя.
Мамо-мамцьо, мамичко моя, /х2
Ліпше з мужом под тернином,
Як з мамичком под перином,
Мамо-мамцьо, мамичко моя.
/………………../
Document Information
Document URL: http://lemko.org/lemko/madzik/lw3.html
Return to Lemko Home
PageDate Posted: July 28, 2002
Last Revision:
| LV Productions c/o Walter Maksimovich 3923 Washington Street, Kensington MD 20895-3934 USA |